శంషాబాద్, జనవరి 4:
హైదరాబాద్లోని రాజీవ్ గాంధీ అంతర్జాతీయ విమానాశ్రయం (RGIA) నుండి అబుదాబి వెళ్లాల్సిన ఇండిగో విమానంలో తలెత్తిన సాంకేతిక లోపం ప్రయాణికులకు చుక్కలు చూపించింది. ఇండిగోకు చెందిన 6E-1407 నంబర్ గల విమానం చివరి నిమిషంలో నిలిచిపోవడంతో ప్రయాణికులు తీవ్ర ఇబ్బందులకు గురయ్యారు.
విమానం బయలుదేరడానికి సిద్ధంగా ఉన్న సమయంలో సిబ్బంది సాంకేతిక సమస్యను గుర్తించారు. దీనితో భద్రతా కారణాల దృష్ట్యా విమానాన్ని నిలిపివేసి, లోపాన్ని సరిదిద్దేందుకు ఇంజనీర్లు ప్రయత్నించారు. అయితే, విమానం ఎప్పుడు బయలుదేరుతుందనే విషయంలో సిబ్బంది స్పష్టమైన సమాచారం ఇవ్వకపోవడంతో ప్రయాణికుల్లో అసహనం పెరిగింది.
సమస్య తీవ్రతను గమనించిన ఇండిగో ఎయిర్లైన్స్ అధికారులు, ప్రయాణికులను గమ్యస్థానానికి చేర్చేందుకు ప్రత్యామ్నాయ మార్గాలను అన్వేషిస్తున్నారు. ఈ మేరకు ఎయిర్ ట్రాఫిక్ కంట్రోల్ (ATC) సిబ్బందితో చర్చలు జరుపుతున్నారు. మరో విమానాన్ని ఏర్పాటు చేసే అవకాశం ఉన్నట్లు తెలుస్తోంది.
ప్రస్తుతానికి అందుతున్న సమాచారం ప్రకారం, ఈ విమానం అర్ధరాత్రి 12 గంటల తర్వాత బయలుదేరే అవకాశం ఉందని ఇండిగో సిబ్బంది సూచనప్రాయంగా తెలిపారు. ఊహించని ఈ విమాన ఆలస్యం వల్ల కలిగిన అసౌకర్యానికి ఇండిగో యాజమాన్యం ప్రయాణికులకు క్షమాపణలు చెప్పింది. అప్పటివరకు ప్రయాణికులకు అవసరమైన కనీస సదుపాయాలను కల్పించేందుకు అధికారులు ప్రయత్నిస్తున్నారు.